Oor Ons
Die G-Arté Komitee (Gimmie Kunste / G-Arté) is toegewy aan die volhoubare groei en langtermynbevordering van die kunste by Potchefstroom Gimnasium.
Ons streef daarna om voldoende hulpbronne en geleenthede vir leerders en personeel te voorsien, terwyl ons ’n lewendige kultuur van kreatiwiteit en artistieke uitdrukking binne die skool en die breër gemeenskap bevorder.
Ons Visie
Om volhoubare ondersteuning en langtermynontwikkeling van die kunste by Potchefstroom Gimnasium te verseker deur toeganklike hulpbronne en geleenthede, en die voortdurende bevordering van ’n kreatiewe en inspirerende omgewing vir leerders, personeel en die breër gemeenskap.
Ons Missie
Die G-Arté Komitee bevorder die voortdurende groei van die kunste by Potchefstroom Gimnasium deur fondse te genereer via lidmaatskap en gestruktureerde geleenthede wat leerderdeelname aanmoedig. Ons belê strategies in inisiatiewe wat die skool se kunsprogramme versterk en uitbrei vir ’n blywende impak.
Ons Doelwitte
Samewerking en Ondersteuning
Om onafhanklik van die skoolkalender te funksioneer terwyl onderwysers se insig en leiding as riglyn gebruik word om alle kunsaktiwiteite te ondersteun.
Finansiële Volhoubaarheid
Om ’n sterk en volhoubare finansiële basis te bou vir projekte, infrastruktuurontwikkeling en kunsgeleenthede.
Ledebetrokkenheid en Voordele
Om lede betekenisvolle waarde te bied deur deelname, eksklusiewe ervarings en betrokkenheid by die skool se kunsprogramme.
Leerderontwikkeling en Trots
Om geleenthede te skep wat leerdervertroue, trots en passie vir die kunste bevorder.
Deursigtigheid en Goeie Bestuur
Om as ’n deursigtige, aanspreekbare en onafhanklike komitee te funksioneer met duidelike langtermynbeplanning en verantwoordelike bestuur.
Volhoubare Bestuur en Kontinuïteit
Om doeltreffendheid en kontinuteit binne die komitee te verseker, selfs wanneer personeel, direkteure of ouers verander.
Ons Verbintenis
By Gimmie Kunste / G-Arté glo ons dat die kunste die hart van Potchefstroom Gimnasium vorm.
Deur strategiese ondersteuning, samewerking en gemeenskapsbetrokkenheid, wil ons ’n blywende nalatenskap van kreatiwiteit, trots en geleenthede vir elke leerder skep.
Voordele
Ons is tans besig om ’n kalender van kunsgeleenthede saam te stel wat die publiek kan bywoon, soos markdae, vertonings deur gas-kunstenaars, deelname aan kompetisies, en meer.
As jy deel is van ons G-Arté Ondersteunersklub:
- Kry jy afslag op kaartjies en die keuse van sitplekke by geleenthede.
- Bly jy altyd op hoogte van die nuutste nuus oor die kunste, eerste per WhatsApp-groep.
- Kry jy die geleentheid om by te dra en deel te wees van die sukses van die kunste by Potchefstroom Gimnasium.
Deur deel te wees van die klub, help jy om die kunste te ondersteun, uit te bou en volhoubaar te maak.
Direkteur:
Pieter Marais
Potch GIM NPO – Kunste
G-Arté Individu Aansluitings
Nadat die debietorder suksesvol via een van hierdie skakels gelaai is, keur asseblief die debietorder binne 4 minute op die banktoepassing goed.
G-Arté Besigheid Aansluitings
Nadat die debietorder suksesvol via een van hierdie skakels gelaai is, keur asseblief die debietorder binne 4 minute op die banktoepassing goed.
Vleuelklavier Fonds Insameling
Die Yamaha GC2PE, soos die meeste standaard vleuelklaviere, het 88 sleutels, wat 7 volledige oktawe plus ’n klein terts dek.
Die konsep is om die totale koste van die klavier in 88 dele te verdeel — een vir elke sleutel op die instrument.
Individue, of besighede kan dan ‘n sleutel borg, of groepe kan saamstaan om een sleutel te borg. Dit maak dit vir meer mense moontlik om betrokke te raak en dra by tot ‘n persoonlike verbinding met die projek.
Ons raam die waarde van die klavier op tot R500 000, om stygings in pryse en wisselkoersveranderings in ag te neem.
Voordele van die nuwe vleuelklavier by Gimmies
- Gimmies kan ’n nasionale klavierkompetisie aanbied wat jaarliks in Gauteng plaasvind. Die organiseerder is ’n oud-Gimmie en wil ons skool as venue gebruik vir uitdunne en moontlik die finaal. Indien dit nie hier moontlik is nie, sal die kompetisie na die Universiteit van Stellenbosch skuif.
- Graad 12-leerders wat musiek as vak neem, sal hul eindeksamen ekstern op hierdie klavier doen. Dit gee hulle die geleentheid om gevorderde tegnieke te gebruik wat nie op ’n gewone vleuel moontlik is nie, en bevorder die ontwikkeling van hul vaardighede tydens die eksamen.
- Graad 10–12-leerders wat klavier as vak neem, sal die klavier daagliks vir hul lesse en inoefening gebruik. Ook die kind van ons nuwe hoof, wat musiek studeer, sal van die klavier voordeel trek.
- Jaarlikse praktiese assesseringstake vir graad 10–12-leerders sal op die vleuelklavier uitgevoer word, wat ’n hoër vlak van professionele voorbereiding moontlik maak.
- Die kultuurdepartement se jaarlikse Eisteddfod, waaraan skole van Noordwes deelneem, sal die klavier gebruik vir uitvoerende kuns, wat ook ander skole se leerders kan inspireer en moontlik Gimmies se profiel verhoog.
- Tommie Ferreira, vakonderwyser, het ’n goeie verhouding met die NWU Musiekdepartement, wat ook toegang tot die klavier kan hê vir klasgewing of konserte.
- Gimmies beoog om meer kamerkonserte vir die dorp en skool aan te bied, en die vleuelklavier sal ’n kerninstrument hiervoor wees.
- Die klassieke musiekorkes, bestaande uit lede van Gimmies, die Musieksentrum, NWU en lokale musikante, oefen weekliks in die kultuursaal en kan die klavier vir konserte gebruik.
- Met slegs drie skole in Noordwes wat musiek as vak aanbied, kan die vleuelklavier ’n belangrike rol speel in die aantrekking van nuwe leerders na Gimmies.
- Die klavier sal in die kultuursaal op ’n spesifieke, vaste plek geplaas word en slegs gebruik word met toestemming van Loretté (hoof uitvoerende kunste) of Tommie (vakonderwyser).
Kortom: Die aanwesigheid van ’n vleuelklavier by Gimmies sal talle musiekgeleenthede moontlik maak, die leerlinge se vaardighede ontwikkel, en die skool se musiekprogram op ’n nuwe vlak bring.
Elke Sleutel eienaar of groep eienaars kry
- Erkenning – Jou naam sal as ondersteuner van die kunste vereer word.
- Eienaarskapsertifikaat – Digitale en gedrukte sertifikate om jou bydrae te herdenk.
- Dank op Sosiale Media – Spesiale vermelding van individue en besighede wat die klavier ondersteun op ons platforms.
- Eksklusiewe Inhoud – Video’s van die klavier wat gespeel word, of opnames van optredes, direk aan jou gestuur.
- Foto met die Klavier – ’n Herinneringsfoto van jou saam met die instrument.
- Prioriteitspraktyk & Selfopname (indien jy speel) – Geniet gratis, prioriteits toegang tot oefensessies en opnamegeleenthede.
- Sleutel-eienaars Gala-aand – ’n Spesiale geleentheid om alle borge te vier, waar jy die kunstenaars en ander ondersteuners kan ontmoet.
